Il-jum tal-Ħadd kien jum speċjali għall-Marsin hekk kif il-komunita tal-Marsa laqgħet lura l-vara ta' Maria Reġina wara li din il-vara kienet ilha nieqsa għal sentejn minħabba ħidma ta' ndurar li sar fuq il-vara. \n\nDalgħodu fil-Marsa kien organizzat programm ta' attivitajiet għal din l-okkażjoni. L-istatwa ntlaqgħet b'marċi mill-Banda Maria Reġina u mill-Iscouts tal-lokalita. L-istatwa daħlet lura fil-knisja għad-daqq tal-marċi u l-innu miktub apposta għal din l-okkażjoni. Wara kienet iċċelebrata quddiesa bis-sehem tal-għaqdiet kollha tal-parroċċa. \n\nMatul dawn is-sentejn sar xogħol fuq ġewwa tal-istatwa titulari ta' Maria Reġina u l-libsa tal-vara saret mill-ġdid bir-restawr kollu jsir mill-artist magħruf Alfred Camilleri Cauchi. \nL-indurar tal-istatwa sar mill-artist Horace Farrugia - l-aħħar xogħol ta' indurar tiegħu.